1Ti 2 | PMA | STEP | Timoti, ekvati mok keke lises, mihesan hisien keil min Ahi koa ten heramien ka ten masmasien. Ka mihehis emun ven meatin sav keil:

1 Timothy 2

Sakien ten Sukul

1 Timoti, ekvati mok keke lises, mihesan hisien keil min Ahi koa ten heramien ka ten masmasien. Ka mihehis emun ven meatin sav keil: 2 koakeil avi asuv houlu ka koakeil avi hetetamen koa alosil katir. Hesakini, rokilea rovato en tahosien ka en tomat vatal min meatin sav keil, ka rokilea rovaha netan min Ahi ka sakien orer housil rendemien onen. 3 Vati hisien keil enek tahos ka Ahi koa mututir si veni. 4 Kei envati voutut meatin vasi keil ka sakin keil ilea hihiseien ten anatinien onen koanik:

5 Ahi, kei tanges;
ka meatin tanges mul lah ruain meatin keil ten out netan avamai en tomat vatal Ahi,
isen Iesu Kristo.
6 Kei enges san kei mat vahul lat meatin vasi keil ran matien.

Ka navong kei vinat ir, mul rie lati keke avong mal koa Ahi envat meatin vasi keil avakur moulien hau. 7 Ven koanek, Ahi sila inau nasuval eiloheh tai. !Naviteni anatin, narluvostei! Anatin, kei sila nau keke namul navitehiten more longlongien onen ka navisein koakeil arvitei Siu en sise ten demkatien koa vi anatin.

8 Sakini, en avong vasi navong misukul en out tas, ekvat meatin keil onen Ahi avahis ka isan he koa tisaen tovuol ien hehina nesa. Anavurohtei ka anasel kututtei en keil. 9 Ka vati rendemien enek, ahin keil anandemtei houlu usil eisin one. Anamosanintei keil en hilie vuo tounah koa mul en ralinge ka hire, vuo anavuttei keil en eisin koa vatu teni vina nesa. Vuo! Ekvati keke keil isin revi keil en sakien ten merauen ka houhouen. 10 Ahin keil imosanin keil en umen tetahos hevinvin en ahin keil koa avit avousil Ahi. 11 Navong amo keil amul avisehisei, ahin keil anavertei, ikur hihiseien keil ka ilong kat keil en sakien ten merauen. 12 Narmaentei ahin keil avahihisein amo keil vuo avamai avahi avat en meahos keil. Ahin keil ito raeng hetal houhouen en avong tahihiseien. 13 Veni Ahi mumon Adam mulamu, ka Iv katau suk. 14 Ka rovitei Adam vamot en liluvosien, ahin keke mot eni ka ralivas mengkatien onen Ahi varei. 15 Ka Ahi houtut moulien onen ahin keil navong keil amumon umen mal one, avakur titiali keil. Ka keil akilea akur moulien hau munak demkatien ka envatien one mul, ka usil kat Ahi en sakien ten merauen.